సౌరవిద్యుత్తుతో నడిచే రకరకాల ఉపకరణాలు మనకు అందుబాటులోకి వచ్చేశాయి. గ్యాస్‌కు ప్రత్యామ్నాయంగా వండివార్చడానికి స్టవ్‌ రూపంలోనూ ఇప్పుడు వంటింట్లోకి వచ్చేసింది ఈ టెక్నాలజీ. గ్యాస్‌, విద్యుత్తు వంటి వనరులు వృథా కాకుండా సౌరవిద్యుత్తుతో నడిచే కుకింగ్‌ టాప్‌ను డిజైన్‌ చేసి రూపొందించింది ఇండియన్‌ ఆయిల్‌ కార్పొరేషన్‌. ఈ స్టవ్‌ను ఛార్జింగ్‌ చేసుకోవచ్చు, నేరుగా ప్యానెళ్లకు అనుసంధానించీ వాడుకోవచ్చు. ఈ మధ్యనే ‘ఇండియా ఎనర్జీ వీక్‌ 2023’లో ఆవిష్కరించిన ఈ స్టవ్‌ ప్రధానికి ఎంతగానో నచ్చేసింది. దేశవ్యాప్తంగా పలు గ్రామాల్లో వీటిని అందుబాటులోకి తీసుకొచ్చే పనిలో పడింది ఆయిల్‌ కార్పొరేషన్‌.