భలే కానుక!

ఆ మాస్టారి పేరు మనోజ్‌కుమార్‌. ఈ ఏడాది మార్చ్‌లో స్కూల్‌ నుంచి రిటైర్‌ కాబోతున్నాడు. వెళ్ళేలోపు తమ స్కూలు పిల్లలకి ఓ మంచి బహుమతి ఇవ్వాలనుకున్నాడు. తనకి తెలిసిన మంచి కానుక గాంధీజీ స్వీయచరిత్ర రచన ‘సత్యశోధన’ పుస్తకమే. అయితే ఆ బడిలో ఉన్నది మొత్తం 2500 మంది పిల్లలు. సత్యశోధన పుస్తకం ధరేమో వందరూపాయలు. అంటే- పాతికవేలు. మొత్తానికి తన జీతంలో సగాన్ని ఖర్చుపెట్టాల్సి వచ్చినా అనుకున్నది చేశాడు. జనవరిలో పండగ సెలవులకని వెళ్ళిన పిల్లలు తిరిగి రాగానే పేరుపేరునా అందరికీ దాన్ని పంచాడు.

‘నేను వెళితేనేం- గాంధీ మీకు జీవితాంతం తోడుంటాడు’ అని అందులో రాశాడు. చిన్నపిల్లలేమోగానీ- కాస్త పెద్ద పిల్లలు మాత్రం ఆయన అభిమానానికి కన్నీళ్ళు పెట్టుకున్నారు. కేరళ కోళిక్కోడులోని రామకృష్ణ మిషన్‌ హైస్కూల్‌లో జరిగిందీ స్ఫూర్తిదాయక సంఘటన. ‘గాంధీజీ సత్యశోధన- ఈ వయసులోనూ నా జీవితానికి దిక్సూచిగా ఉంటూ వస్తోంది. అదే స్ఫూర్తి ఈ పిల్లల్లో ఒక్కరికి కలిగినా చాలు’ అంటున్నాడు మనోజ్‌.