అడవులకి అతని పేరు పెట్టారు!

మనదేశంలో అడవులకి మనుషుల పేర్లు పెట్టడం చాలా అరుదు! ఉత్తరాదిన జిమ్‌ కార్బెట్‌, దక్షిణాదిన అన్నా, రాజాజీ ఇలా ఏవో కొన్ని మాత్రమే కనిపిస్తుంటాయి. కానీ ఒడిశాలోని మూడు చిట్టడవులకి ఓ వ్యక్తిపేరుని పెట్టింది అక్కడి ప్రభుత్వం. ఆయన పేరు మిత్రభాను నాయక్‌... ఓ మామూలు అడవి కాపలాదారు! ఒడిశాలోని కియాంజర్‌ జిల్లాలోని బెల్దా అనే రిజర్వ్‌ అడవి అక్కడి మైనింగ్‌ పనుల కారణంగా ఎడారిగా మారింది. దాన్ని మళ్ళీ అడవిగా మార్చేందుకు పదేళ్ళకిందట నడుం బిగించింది అటవీశాఖ. ఆ బాధ్యతని మిత్రభానుకి అప్పగించింది. తానూ, తనతోపాటున్న కొద్దిపాటి సిబ్బందీ ఆ పని పూర్తిచేయలేరని గ్రహించాడు మిత్రభాను. చుట్టుపక్కలున్న పల్లెలవాళ్ళనీ అతికష్టంపైన ఒప్పించి భాగస్వాముల్ని చేశాడు. అలా అందరూ కలిసి పదేళ్ళలో ఎడారిభూమిని నిండైన అడవిగా మార్చేశారు. ఇలా సుమారు 85 హెక్టార్ల అడవిని పునరుద్ధరించాడు మిత్రభాను. అందుకే మిత్రభాను-1,2,3 అని వాటికి నామకరణం చేసింది ఒడిశా ప్రభుత్వం! ఓ సామాన్య ఉద్యోగికి ఇంత గౌరవం దక్కడం అరుదే కదూ!