ఆ తల్లి పేరు దగ్గులవ్వ!

భక్తులకున్న రకరకాల అవసరాలని బట్టి దేవతలూ ఉంటారని మనకి తెలిసిందే! వీసాలు ఇప్పించే చిలుకూరు బాలాజీ నుంచి పరీక్షలు పాస్‌ చేయించే విశాఖ వినాయకుడిదాకా అలా మనకు చాలా గుళ్ళే పేరొందాయి. ఆదిలాబాద్‌ జిల్లా బేల మండలంలోని ఆ గుడికీ ఓ ప్రత్యేకత ఉంది. అందులో కొలువైన దేవత పేరు దగ్గులవ్వ. పేరుకు తగ్గట్టే ఎటువంటి దగ్గు సమస్యలనైనా పోగొడుతుందన్నది భక్తుల విశ్వాసం. బేల మండల కేంద్రంలోని పోలీస్‌ స్టేషన్‌ కాలనీలో ఉండే ఈ గ్రామదేవత ఆలయం అతిప్రాచీనమైందని అంటారు. జలుబు నుంచి న్యుమోనియాదాకా ఏ సమస్య కారణంగా దగ్గు వచ్చినా ఈ తల్లికి మొక్కుకుంటారు. పక్కనే ఉన్న పెన్‌గంగ నది నీటితో ఈ దేవతని అభిషేకించి... దాన్నే దగ్గు తీర్చే తీర్థంగా తీసుకుంటారు. వైద్యంతో అనారోగ్యం తగ్గాక అన్నదానం చేసి మొక్కులు చెల్లించుకుంటారు. ప్రతి ఆషాఢంలోనూ పెద్ద ఎత్తున పండగ చేస్తారు. బోనాలెత్తుతారు. ఈ ఆలయంలో ఈ మధ్యే కొత్త విగ్రహాన్ని ఏర్పాటుచేసి వైభవంగా ప్రాణప్రతిష్ఠ చేశారు.