‘ఏయ్‌ ఎస్‌ఐ.. ఎందుకయ్యా నీకు ఉద్యోగం ఇచ్చింది?

రైతు భరోసా సభలో మాజీ మంత్రి ముత్తంశెట్టి ఆగ్రహం
ప్రశ్నించిన రైతును నిలువరించలేదని మండిపాటు

విశాఖపట్నం (ఆనందపురం, పద్మనాభం), న్యూస్‌టుడే: తనకు అన్యాయం జరిగిందని గోడు వెళ్లబోసుకునేందుకు వేదిక వద్దకు వచ్చిన ఓ రైతును పోలీసులు నిలువరించలేదని మాజీ మంత్రి, భీమిలి ఎమ్మెల్యే ముత్తంశెట్టి శ్రీనివాసరావు ఆగ్రహం వ్యక్తం చేశారు. ‘ఏయ్‌ ఎస్‌ఐ... ఎందుకయ్యా నీకు ఉద్యోగం ఇచ్చింది’ అంటూ మండిపడ్డారు. రైతు భరోసా 4వ విడత నిధుల విడుదల కార్యక్రమాన్ని విశాఖ జిల్లా పద్మనాభం మండలం కోరాడలో వ్యవసాయశాఖ అధికారులు సోమవారం నిర్వహించారు. ఆ వేదికపై స్థానిక నాయకులు మాట్లాడుతుండగా... అదే పంచాయతీ పరిధిలోని గెద్దపేటకు చెందిన సూర్యనారాయణ అనే రైతు... తన 98 సెంట్ల జిరాయితీ భూమిని జగనన్న కాలనీకి అన్యాయంగా తీసుకున్నారనే విషయం చెప్పేందుకు వేదిక వద్దకు రాగా.. పోలీసుల సాయంతో ఆయనను ముత్తంశెట్టి సభ నుంచి బయటకు పంపించి వేశారు. ఆ రైతును ఎందుకు నిలువరించలేదంటూ స్థానిక ఎస్‌ఐపై మండిపడ్డారు. ఈ సందర్భంలో ఓ మీడియా ప్రతినిధిపై ‘నీ సంగతి చూస్తానంటూ’ బెదిరింపులకు దిగారు. ‘అన్నీ ఇస్తుంటే ఇలాగే ఉంటుంది. మీ వద్దకు  వస్తున్నామని చులకనగా చూడొద్దు. వాస్తవాలను తెలుసుకోవాలి’ అని ప్రజలనుద్దేశించి వ్యాఖ్యానించారు.