ఆ భూములు అధికారులే ఇచ్చారు!

రాజంపేట ఎమ్మెల్యే మేడా మల్లికార్జునరెడ్డి

రాజంపేట గ్రామీణ, న్యూస్‌టుడే: తమ కుటుంబానికి అధికారులు ప్రభుత్వ భూములు కేటాయిస్తూ డీకేటీ పట్టాలిచ్చారని అన్నమయ్య జిల్లా రాజంపేట వైకాపా ఎమ్మెల్యే మేడా మల్లికార్జునరెడ్డి తెలిపారు. మేడా ఇంటి పేరుతో అతి పెద్ద కుటుంబం ఉందని, గతంలో తమ కుటుంబ పరిస్థితిని దృష్టిలో పెట్టుకుని డీకేటీ భూములిచ్చారన్నారు. ‘ఈనాడు’లో సోమవారం ‘మేడా.. మేసేశారు!’ శీర్షికన ప్రచురితమైన కథనంపై ఆయన స్పందిస్తూ రాజంపేటలో సోమవారం ఆయన విలేకరులతో మాట్లాడారు. తామెప్పుడూ ప్రభుత్వ భూములను స్వాహా చేయలేదని, తమ పొలాలకు సమీపంలో ఉన్న ప్రభుత్వ భూములకు అధికారులు డీకేటీ పట్టాలిచ్చారన్నారు. ఈ భూముల విలువ పోల్చుకుంటే తమ కుటుంబంతో పాటు గుత్తేదారు కంపెనీ ద్వారా  దానధర్మాలకు వెచ్చించిన రూ.15 కోట్ల మొత్తం అతి పెద్దదని వివరించారు. తమ కుటుంబానికి ఇతరులను దోచుకోవడం.. అన్యాయం తలపెట్టడం తెలియదని మేడా పేర్కొన్నారు.