షర్మిల, సునీత, బీటెక్‌ రవి పిటిషన్ల కొట్టివేత

కడప న్యాయవిభాగం, న్యూస్‌టుడే: వైఎస్‌ వివేకా హత్య కేసుకు సంబంధించి బహిరంగంగా మాట్లాడవద్దని ఇచ్చిన ఉత్తర్వులను రద్దు చేయాలని దాఖలైన మూడు వెకేషన్‌ పిటిషన్లను కొట్టివేస్తూ కడప జిల్లా ప్రధాన న్యాయమూర్తి జి.శ్రీదేవి బుధవారం తీర్పు చెప్పారు. వివేకా హత్య కేసుపై కొందరు అసత్య ప్రచారం చేస్తున్నారని, దీనిపై చర్యలు తీసుకోవాలని వైఎస్సార్‌ జిల్లా వైకాపా అధ్యక్షుడు సురేష్‌బాబు గత నెలలో కడప కోర్టులో సివిల్‌దావా వేశారు. దీనిపై విచారించిన కోర్టు ఈ కేసుకు సంబంధించి ఎవరూ మాట్లాడవద్దని ఏప్రిల్‌ 16న ఉత్తర్వులు ఇచ్చింది. వాటిని రద్దు చేయాలని వైఎస్‌ షర్మిల, సునీత, బీటెక్‌ రవిలు హైకోర్టులో వేర్వేరుగా పిటిషన్లు దాఖలు చేయగా, కడప కోర్టుకే వెళ్లాలని సూచించింది. దీంతో వారు ఇక్కడ పిటిషన్లు వేశారు. విచారించిన జిల్లా ప్రధాన న్యాయమూర్తి జి.శ్రీదేవి ఉత్తర్వులను రద్దు చేసేందుకు తగిన ఆధారాలు చూపలేదని, వాటిని కొట్టివేస్తూ తీర్పునిచ్చారు. పిటిషన్‌ ఖర్చుల కింద ముగ్గురూ రూ.10 వేల చొప్పున జిల్లా న్యాయసేవాధికార సంస్థకు చెల్లించాలని ఆదేశించారు.