దేశీయ అంకురాలు అమెరికా విపణిని అందిపుచ్చుకుంటున్నాయ్‌

భారతీయ అమెరికన్‌ వ్యాపారవేత్త రంగస్వామి

సిలికాన్‌ వ్యాలీ (అమెరికా): విజయవంతమైన భారత అంకుర సంస్థలు, క్రమంగా అమెరికాలోని సిలికాన్‌ వ్యాలీకి తరలిపోయే ధోరణి ప్రారంభమైందని.. అమెరికా విపణిని అందిపుచ్చుకోవాలనే ఆకాంక్షేఇందుకు కారణమని ప్రముఖ భారతీయ అమెరికన్‌ వ్యాపారవేత్త ఎంఆర్‌ రంగస్వామి వెల్లడించారు. గత కొన్నేళ్లలో 300-400 విజయవంతమైన భారత అంకురాలు అమెరికాకు వెళ్లాయని వివరించారు. ‘గత 3-4 ఏళ్లలోనే ఈ ధోరణి ప్రారంభమైంది. భారత్‌లో ప్రారంభమైన సాస్‌ తరహా కంపెనీలే ఇందులో అధికం. అధిక నైపుణ్యం కలిగి, భారత వ్యవస్థాపకులతో మొదలైన కంపెనీలు అతిపెద్ద అమెరికా ఖాతాదారులను పొందుతున్నాయి. తదుపరి వారికి అవసరమైన ఉత్పత్తులను సృష్టించి, వారికి చేరువయ్యేందుకు అమెరికాకు వచ్చేస్తున్నాయి’ అని రంగస్వామి వెల్లడించారు. భారీమొత్తం ఆర్డర్లు ఇచ్చే ఖాతాదారులు భారత్‌లో ఎక్కువగా లేకపోవడం కూడా ఇందుకు ఒక కారణమేనని అభిప్రాయపడ్డారు.