Nellore: భర్త అంత్యక్రియలు ముగిసిన కొన్ని గంటలకే భార్య మృతి

తోటపల్లి గూడూరు: భర్త మరణాన్ని ఆమె తట్టుకోలేకపోయింది. 24 గంటలైనా గడవకముందే కట్టుకున్నవాడిని వెతుక్కుంటూ వెళ్లిపోయింది. ఈ విషాద ఘటన నెల్లూరు జిల్లా  తోటపల్లి గూడూరు మండలం నరుకూరు గ్రామంలో బుధవారం జరిగింది. అనారోగ్య కారణంగా భార్యాభర్తలు ఒకేరోజున మృతి చెందడం గ్రామస్థులను కలచివేసింది.

నరుకూరు గ్రామానికి చెందిన రమణ(40), సుమలత(36) భార్యాభర్తలు. కొద్దిరోజుల నుంచి అనారోగ్య సమస్యలతో ఇబ్బందులు పడుతున్నారు. ఈక్రమంలో వారం రోజుల క్రితం చికిత్స నిమిత్తం రమణను కుటుంబ సభ్యులు చెన్నై తరలించారు. ఆ తర్వాత మళ్లీ నిన్న ఉదయం చెన్నై నుంచి నెల్లూరు ప్రభుత్వాసుపత్రికి తీసుకొచ్చారు. భర్త చికిత్స పొందుతున్న సమయంలో భార్య సుమలత కూడా అనారోగ్యానికి గురవడంతో ఆమె చెన్నైలో చికిత్స పొందుతోంది. రమణ బుధవారం ఉదయం నెల్లూరు ప్రభుత్వాసుపత్రిలో చికిత్స పొందుతూ మృతి చెందాడు. భర్త అంత్యక్రియలు పూర్తయిన కొన్ని గంటల వ్యవధిలోనే సుమలత చెన్నైలోని ఆసుపత్రిలో మృతి చెందారు.