AP News: కేజీహెచ్‌లో ఆత్మహత్యాయత్నం.. కాపాడిన సిబ్బంది

విశాఖపట్నం: విశాఖలోని కేజీహెచ్‌ ఆసుపత్రి సీఎస్‌ఆర్‌ బ్లాక్ పైనుంచి దూకబోయిన ఓ కొవిడ్  బాధితురాలిని వైద్య సిబ్బంది రక్షించారు. ఆస్పత్రిలో చికిత్స పొందుతున్న మహిళ ఆత్మహత్యకు ప్రయత్నించటాన్ని గమనించిన సిబ్బంది ఆమెను కాపాడారు. కొద్దిరోజులుగా  కుటుంబానికి దూరంగా ఉండటంతో తనను ఇంటికి పంపించాలని వైద్యులను కోరింది. ఆమె కోలుకోకపోవటంతో వైద్యులు నిరాకరించారు. ఈ క్రమంలో ఆమె చికిత్స పొందుతున్న గది కిటికీ వద్దకు వెళ్లి దూకేందుకు సిద్ధపడింది. 

సమీపంలో ఉన్న మరో కరోనా బాధితుడు గమనించి కేకలు వేయడంతో అప్రమత్తమైన సిబ్బంది ఆమెను అడ్డుకున్నారు. ఇప్పటికే ఈ బ్లాక్‌లో నలుగురు బాధితులు మేడపై నుంచి దూకి ఆత్మహత్యకు పాల్పడ్డారు. దీంతో ఈ విషయాన్ని ఆసుపత్రి సిబ్బంది బయటకు వెల్లడించలేదు. సీసీటీవీ ఫుటేజీ బయటకు రావడంతో విషయం వెలుగులోకి వచ్చింది.