వైకాపాకు ‘బొకినాల’ రాజీనామా

హనుమాన్‌జంక్షన్‌, న్యూస్‌టుడే: బాపులపాడు మండలం మల్లవల్లికు చెందిన వైకాపా నాయకుడు బొకినాల సాంబశివరావు ఆ పార్టీకి రాజీనామా చేస్తున్నట్లు మంగళవారం ఓ ప్రకటన విడుదల చేశారు. గతంలో దుట్టా అనుచరుడిగా ఉన్న తాను, వల్లభనేని వంశీ ప్రోత్సాహంతో తెదేపాలో చేరానని, ఆ తర్వాత ఆయనతో పాటే వైకాపాలోకి వచ్చి నాలుగున్నరేళ్లు కష్టపడి పనిచేశానన్నారు. మల్లవల్లిలో ఏపీఐఐసీ భూములు తీసుకున్న సమయంలో తనకు పరిహారం రాలేదని, ఎమ్మెల్యేగా ఉన్న వంశీ న్యాయం చేస్తానని చెప్పి ఏమీ చేయలేదన్నారు. పైగా తన భూములకు సంబంధించి జరుగుతున్న వివాదాల్లో ప్రత్యర్థి వర్గం వారికి ఎమ్మెల్యే కార్యాలయం అండగా నిలిచిందన్నారు. వైకాపా మండల అధ్యక్షుడు నక్కా గాంధీ కూడా న్యాయం చేస్తానని చెప్పి మోసగించారన్నారు. అందుకే రాజీనామా చేస్తున్నానని, త్వరలో ఏ పార్టీలో చేరేది వెల్లడిస్తానన్నారు.