‘రాష్ట్రంలో వైకాపా రాక్షస పాలన’

ఎన్నికల ప్రచారంలో బాబూరావు తదితరులు

అజిత్‌సింగ్‌నగర్‌ (మధురానగర్‌), న్యూస్‌టుడే : రాష్ట్రంలో వైకాపా రాక్షస పాలనతో జనం విలవిలలాడుతున్నారని సెంట్రల్‌ సీపీఎం అభ్యర్థి సి.హెచ్‌.బాబూరావు ఆగ్రహం వ్యక్తం చేశారు. బుధవారం అజిత్‌సింగ్‌నగర్‌లో ఆయన పర్యటించారు. ఇంటింటికీ తిరిగి ఓట్లు అభ్యర్థించారు. ముఖ్యమంత్రిపై రాయి దాడి కేసులో అమాయకులను వేధించటం తగదన్నారు. అజిత్‌సింగ్‌నగర్‌పై చెడు ముద్ర వేయడం సరికాదన్నారు. విద్యుత్తు కోత, అంతర్జాల కేబుళ్ల తొలగింపు, చెట్లు నరకటం ఏంటని ప్రశ్నించారు. ఇది ప్రజల్లో తీవ్ర ఆగ్రహం కలిగించిందన్నారు. కాంగ్రెస్‌, సీపీఐ నాయకులు పి.వై.కిరణ్‌, తమ్మిన దుర్గ తదితరులు మాట్లాడారు. నగరంలో ప్రశాంత వాతావరణం కోసం ఇండియా వేదిక బలపరిచిన బాబూరావును గెలిపించాలని కోరారు. రమణారావు, చిట్టిబాబు, సన్యాసిరావు, రసూల్‌, రషీద్‌ తదితరులు పాల్గొన్నారు.