పెట్రో ధరలు తగ్గించండి

ద్విచక్రవాహనాన్ని తోసుకుంటూ వస్తున్న ఉమామహేశ్వరనాయుడు, నాయకులు

కళ్యాణదుర్గం, న్యూస్‌టుడే: పెట్రో ధరలు తగ్గించాలని తెదేపా నియోజకవర్గ బాధ్యుడు ఉమామహేశ్వరనాయుడు డిమాండ్‌ చేశారు. బుధవారం పార్టీ కార్యాలయం నుంచి టీ సర్కిల్‌లోని పెట్రోల్‌బంక్‌ వరకు నాయకులు ద్విచక్రవాహనాలను తోసుకుంటూ వినూత్న నిరసన తెలిపారు. బంక్‌ వద్ద బైఠాయించి ప్రభుత్వానికి వ్యతిరేకంగా నినాదాలు చేశారు. ఉమామహేశ్వరనాయుడు మాట్లాడుతూ కేంద్రం ధరలు తగ్గించినా రాష్ట్ర ప్రభుత్వం ఎందుకు ఆ దిశగా చర్యలు చేపట్టలేదని ప్రశ్నించారు. సామాన్యుడిపై భారం మోపడమే పనిగా పెట్టుకుందని ఆరోపించారు. నిత్యావసర సరుకుల రేట్లూ తగ్గించాలని డిమాండ్‌ చేశారు.