దారిలో ప్రాణం వదిలిన భార్య.. తల్లడిల్లిపోయిన భర్త

భార్య మృతదేహాన్ని పట్టుకుని రోదిస్తున్న ఈశ్వరప్ప

ఓబుళదేవరచెరువు, న్యూస్‌టుడే : భార్యకు వైద్యం చేయించేందుకు వెళ్తుండగా.. మార్గమధ్యంలో ఆమె మృతి చెందడంతో భర్త చేసిన రోదనలు మిన్నంటాయి. చూపరులను కంటతడి పెట్టించింది. అమడగూరు మండలంలోని మామిడిమేకలపల్లి గ్రామానికి చెందిన ఈశ్వరప్ప తన భార్య చౌడమ్మ (35) అనారోగ్యంతో బాధపడుతుండటతో ఆమెను వైద్య పరీక్షల కోసమని అనంతపురానికి తీసుకెళ్లేందుకు స్వగ్రామం నుంచి ఆటోలో ఓబుళదేవరచెరువుకు చేరుకున్నారు. ఓబుళదేవరచెరువు బస్టాండ్‌కు రాగానే ఆమె పరిస్థితి విషమంగా మారింది. బస్సు కోసం వేచి చూసేలోగా ఆమె మృతి చెందింది. దీంతో మృతదేహాన్ని హత్తుకుని అతను బోరున విలపించడం అందరినీ కలిచివేసింది. కనీసం మృతదేహన్ని స్వగ్రామానికి తీసుకెళ్లేందుకు కూడా అతని వద్ద డబ్బులు లేకపోవడంతో ప్రజలే చందాలు వసూలూ చేసి శవాన్ని ప్రైవేటు వాహనంలో స్వగ్రామనికి చేర్చి ఔదార్యం చాటుకున్నారు.