ఓటు హక్కు వినియోగానికి కార్మికులకు సెలవు

గుంటూరు, న్యూస్‌టుడే: సార్వత్రిక ఎన్నికల్లో మే 13న జరగనున్న పోలింగ్‌లో ఓటు హక్కు వినియోగించుకోవడానికి కార్మికులకు సెలవు ప్రకటించినట్లు మూడో జోన్‌ కార్మిక శాఖ ఇన్‌ఛార్జి సంయుక్త కమిషనర్‌ శుక్రవారం ఓ ప్రకటనలో తెలిపారు. మూడో జోన్‌ పరిధిలోని దుకాణాలు, సంస్థల్లో పని చేస్తున్న ఉద్యోగులు, కార్మికులు తమ ఓటు హక్కు వినియోగించుకోవడానికి కార్మిక శాఖ కమిషనరు ఉత్తర్వులు జారీ చేశారన్నారు. మే 13న దుకాణాలు, సంస్థలకు కూడా సెలవు ప్రకటించినట్లు పేర్కొన్నారు. వ్యాపారం, వాణిజ్యం, పారిశ్రామిక సంస్థలు, ఇతర సంస్థల్లో ఉద్యోగం చేస్తున్న ప్రతి వ్యక్తి శాసనసభ, లోక్‌సభ ఎన్నికల్లో ఓటు వేసేందుకు పోలింగ్‌ రోజు సెలవు మంజూరు చేయాలన్నారు. వేతనాల్లో ఎలాంటి తగ్గింపు చేయకూడదన్నారు. ఏదైనా సంస్థ యజమాని సబ్‌ సెక్షన్‌ (1) నిబంధనలు ఉల్లంఘిస్తే సదరు యజమాని జరిమానాతో శిక్షార్హులవుతారని స్పష్టం చేశారు.