విమానాశ్రయంలో 258 గ్రాముల బంగారం పట్టివేత

శంషాబాద్‌, న్యూస్‌టుడే: సౌదీ అరేబియా నుంచి ఓ ప్రయాణికుడు అక్రమంగా తరలిస్తున్న నాలుగు బంగారు బిస్కెట్లను ఆదివారం శంషాబాద్‌ విమానాశ్రయంలో భద్రతాధికారులు స్వాధీనం చేసుకున్నారు. విమానాశ్రయం అధికారులు తెలిపిన కథనం ప్రకారం.. హైదరాబాద్‌కు చెందిన ఓ ప్రయాణికుడు దమ్మం నుంచి ఇండిగో ఎయిర్‌లైన్స్‌ విమానంలో స్వదేశానికి వచ్చారు. ఈ క్రమంలో 258 గ్రాముల బంగారం బిస్కెట్లను తన సామగ్రిలో రహస్యంగా పెట్టుకొని తీసుకొచ్చాడు. ప్రయాణికుడి ప్రవర్తనపై భద్రతాధికారులకు అనుమానం రావడంతో అదుపులోకి తీసుకొని క్షుణ్నంగా తనిఖీ చేయగా గుట్టురట్టయింది. రూ.13.63 లక్షల విలువ ఉంటుందని అధికారుల తెలిపారు.