తెరాసను బీఆర్‌ఎస్‌గా ఎందుకు మార్చారు?

కేసీఆర్‌ అవినీతి, అక్రమాలపై దేశవ్యాప్త ప్రచారం

వైతెపా రాష్ట్ర నేత గట్టు రామచంద్రారావు

ఫిలింనగర్‌, న్యూస్‌టుడే: తెలంగాణ ప్రజల కోసం పెట్టిన తెరాసను బీఆర్‌ఎస్‌గా ఎందుకు మార్చారని వైతెపా రాష్ట్ర అధికార ప్రతినిధి గట్టు రామచంద్రారావు ప్రశ్నించారు. బంజారాహిల్స్‌ లోటస్‌పాండ్‌లోని పార్టీ కార్యాలయంలో బుధవారం ఆయన విలేకరుల సమావేశంలో మాట్లాడారు. ఉద్యమకారుల పేరు చెప్పుకొని తెరాస నాయకులు బతుకుతున్నారన్నారు. తెరాస తమను అడ్డుకున్నట్లు ఆ పార్టీ పెట్టిన ప్రారంభంలో ఇతరులు అడ్డుకుంటే ఇవ్వాళ మీరు తిరిగేవారా.. అని ప్రశ్నించారు. అలాంటి పరిస్థితే అప్పట్లో ఉంటే కేవలం కాంగ్రెస్‌ ఉండేదన్నారు. ‘షర్మిల తిరిగి పాదయాత్ర చేస్తే ఏం జరిగినా తమకు సంబంధం లేదని తెరాస నాయకులంటున్నారని, అంటే హెచ్చరిస్తున్నారా.. కాపాడలేని వారికి అధికారమెందుకు..’ అని ప్రశ్నించారు. షర్మిల పాదయాత్రకు న్యాయస్థానం అనుమతిచ్చింది.. కోర్టు ఆదేశాలను కూడా పట్టించుకోరా అని అన్నారు. కేసీఆర్‌ అవినీతి, ఆక్రమాలపై దేశవ్యాప్తంగా ప్రచారం చేస్తామన్నారు.