కొట్టేసిన తుపాకీ ఎక్కడ పేలుతుందో..?

నిందితుడు దాన్ని దుర్వినియోగం చేస్తాడేమోనని పోలీసుల ఆందోళన

ఈనాడు- హైదరాబాద్‌: ఓ దొంగ పోలీసులకు కునుకు లేకుండా చేస్తున్నాడు. తొమ్మిదేళ్లు గా అజ్ఞాతంలో ఉంటూ చేతివాటం ప్రదర్శిస్తున్న ఈ ఘరానా దొంగ.. తాజాగా ఓ ఇంట్లో చేసిన చోరీ పోలీసు వర్గాల్లో ఆందోళన రేకెత్తిస్తోంది.

అమ్మో.. రషీద్‌ ఖాన్‌..

ఉత్తరప్రదేశ్‌లోని మీరట్‌కు చెందిన రషీద్‌ ఖాన్‌.. కరడుగట్టిన నేరస్థుడు. సంగారెడ్డి, సైబరాబాద్‌, రాచకొండ పరిధిలో వందకుపైగా చోరీలు చేశాడు. సెల్‌ఫోన్‌ వాడకపోవడం ఇతని ప్రత్యేకత. ఒకేసారి మూడు, నాలుగు చోరీలు చేసి అజ్ఞాతంలోకి వెళ్తాడు. తాజాగా రాచకొండ పరిధిలో నాలుగు చోరీలు చేశాడు. కుషాయిగూడ పరిధిలో ఈనెల 14న ఓ వ్యాపారి ఇంట్లో రూ.8 లక్షలు, 40 తులాల బంగారం చోరీ ఇతని పనే. దానికి సరిగ్గా ఒక రోజు ముందే జవహర్‌నగర్‌లో ఒక మాజీ ఆర్మీ అధికారి ఇంట్లో చోరీ చేశాడు. ఇంట్లో సొత్తుతోపాటు తుపాకీ ఎత్తుకెళ్లడం కలకలం రేపుతోంది. దాన్ని దుర్వినియోగం చేస్తే పరిస్థితి ఏంటని అధికారులు ఆందోళన వ్యక్తం చేస్తున్నారు.

ఇతని స్టైలే వేరప్పా..

ఇళ్లలో ప్రధాన ద్వారానికి బదులు పడక గది కిటికీలు తొలగించి దోపిడీ చేయడం రషీద్‌ ప్రత్యేకత. కొత్తగా నిర్మించే ఇళ్లలో ఎక్కువగా యూపీవీసీ కిటికీలు బిగిస్తున్నారు. వీటిని అలవోకగా తొలగించడంలో నైపుణ్యం సంపాదించిన ఇతడు సరిగ్గా పడకగదిలోకి ప్రవేశిస్తున్నాడు. అంతకుముందుగా రెక్కీ చేస్తాడు. యజమానులు లేని సమయం చూసుకుని నగదు, ఆభరణాలు దొంగిలిస్తాడు. కుషాయిగూడ పరిధిలో తాజాగా జరిగిన చోరీ కేసులోనూ నిందితుడు ఇదే తరహాలో కిటికీ తెరిచాడు. రషీద్‌ ఖాన్‌ పట్టుబడితే రాచకొండ, సైబరాబాద్‌ పరిధిలో ఇళ్లలో జరిగే చోరీలు కొంత మేర అడ్డుకట్ట పడుతుందని ఉన్నతాధికారి చెప్పారు.