రక్తదాన శతకం.. ‘చిరు’ సత్కారం

రాఘవను సత్కరిస్తున్న చిరంజీవి, చిత్రంలో మురళీమోహన్‌, శిల్ప

జూబ్లీహిల్స్‌, న్యూస్‌టుడే: వందసార్లు చిరంజీవి రక్త, నేత్రనిధి కేంద్రంలో రక్తదానం పూర్తి చేసి చరిత్ర సృష్టించిన సినీనటుడు మహర్షి రాఘవను చిరంజీవి ఛారిటబుల్‌ ట్రస్టు నిర్వాహకులు, మెగాస్టార్‌ చిరంజీవి సత్కరించారు. మహర్షి రాఘవను గురువారం జూబ్లీహిల్స్‌లోని తన నివాసానికి చిరంజీవి ఆహ్వానించారు. మరో సినీనటుడు మురళీమోహన్‌తో కలిసి మహర్షి రాఘవను ఘనంగా సత్కరించారు. ఈ సందర్భంగా చిరంజీవి మాట్లాడుతూ.. తాను 1998 అక్టోబరు 2న చిరంజీవి రక్తనిధి కేంద్రం ప్రారంభించినప్పుడు తొలిగా మురళీమోహన్‌ రక్తదానం చేశారని, రెండో దాత మహర్షి రాఘవని గుర్తు చేసుకున్నారు. చిరంజీవి ఛారిటబుల్‌ ట్రస్టులో 50, 60 సార్లు రక్తదానం చేసిన దాతలున్నారని, అయితే క్రమం తప్పకుండా ఒక వ్యక్తి వంద సార్లు రక్తదానం చేయడం ఇదే ప్రథమమని కొనియాడారు. మురళీమోహన్‌ మాట్లాడుతూ ప్రతి మూడు నెలలకు ఒకసారి రక్తదానం చేయడం ఎంతో ఆరోగ్యకరమని, యువత, దాతలు ఇదే తరహాలో ముందుకు రావాలని కోరారు.  చిరంజీవి ప్రత్యేకంగా సత్కరించడం పట్ల మహర్షి రాఘవ, ఆయన సతీమణి శిల్ప ఆనందం వ్యక్తం చేశారు.