20 మంది ఒడిశా కార్మికులకు విముక్తి

స్వగ్రామాలకు వెళ్లేందుకు సిద్ధమైన ఒడిశా కార్మికులు  

మల్యాల, న్యూస్‌టుడే: జగిత్యాల జిల్లాలోని పలు ఇటుక బట్టీల్లో పనిచేసే కార్మికులపై వేధింపులు పెరుగుతున్నాయి. ఈనెల 10న నూకపల్లి శివారులోని ఇటుక బట్టీలో పనిచేసే కార్మికులను యజమాని నిర్బంధించి, వేధింపులకు గురిచేసిన సంఘటన మరవక ముందే.. నూకపల్లి శివారులోని తిరుపతి అనే వ్యక్తికి చెందిన ఇటుక బట్టీలో పనిచేస్తున్న ఒడిశా కార్మికులను వేధిస్తూ స్వగ్రామాలకు వెళ్లకుండా, జీతాలు చెల్లించకుండా పనిచేయిస్తున్న వైనాన్ని కార్మికులు సామాజిక మాధ్యమంలో పోస్టు చేయడంతో పోలీసు ఉన్నతాధికారులు స్పందించారు. గురువారం సీఐడీ డీఎస్పీ శ్రీనివాస్‌, లేబర్‌ ఆఫీసర్‌ కృష్ణకుమార్‌, ఎస్సై చిరంజీవి ఇటుక బట్టీ వద్దకు వెళ్లి విచారణ జరిపారు. కార్మికులు ఎదుర్కొంటున్న ఇబ్బందులను, వేధింపులను ఒడిశా కార్మికులు అధికారులకు వివరించారు. తమను స్వగ్రామాలకు వెళ్లకుండా బట్టీ యజమాని అడ్డుకుంటున్నాడని ఫిర్యాదు చేశారు. దీంతో నలుగురు కానిస్టేబుళ్ల సహకారంతో అధికారులు 13 మంది ఒడిశా కార్మికులను, వారి పిల్లలను స్వగ్రామాలకు పంపించారు. సంఘటనకు సంబంధించి ఇటుక బట్టీ యజమానితోపాటు మరో వ్యక్తిపై ఈనెల 21న మల్యాల ఠాణాలో కేసు కూడా నమోదైనట్లు ఎస్సై చిరంజీవి తెలిపారు.