ఉల్లంఘనులు

నిబంధనలు లెక్కచేయని వైకాపా నేతలు
నామినేషన్‌ కేంద్రం వద్ద హంగామా

పత్తికొండ, పత్తికొండ గ్రామీణం, న్యూస్‌టుడే: అధికారం చేతిలో ఉందని నిబంధనలు లెక్కచేయరు.. ఎన్నికల నియమావళిని పాటించరు.. అధికారులు పట్టించుకోరు.. పత్తికొండలో నామినేషన్ల ప్రక్రియ నేపథ్యంలో ఆర్డీవో కార్యాలయం ఎదుట 144 సెక్షన్‌ విధించారు. పత్తికొండ వైకాపా అభ్యర్థి శ్రీదేవి శుక్రవారం నామినేషన్‌ వేసేందుకు వెళ్లారు. ఆమెతో పాటు వందల మంది కార్యకర్తలు జెండాలు పట్టుకుని తరలొచ్చినా పోలీసులు ఎలాంటి చర్యలు చేపట్టలేదనే ఆరోపణలు ఉన్నాయి.

ఎన్నికల నిబంధనల మేరకు నిషేధిత ప్రాంతాలుగా గుర్తించిన చోట కూడా వైకాపా కార్యకర్తలు జెండాలు చేతపట్టి నానా హంగామా సృష్టించారు. ఈ దృశ్యాలను చిత్రీకరిస్తున్న విలేకరులు వెళ్లిపోవాలని పోలీసులు హుకుం జారీ చేశారు. నిబంధనలు ఉల్లంఘించిన వారిని వదిలేసి.. విలేకరులపై ఇలా వ్యవహరించడం ఏమిటని కొందరు ప్రశ్నించారు. దీంతో పోలీసులు కార్యకర్తలను అక్కడి నుంచి పంపివేశారు. గ్రామాల్లో ఉపాధి పనులు నిలిపివేసి, కూలీలను ఆటోల్లో ఇతర వాహనాల్లో వైకాపా జెండా పట్టించి నామినేషన్‌ ర్యాలీకి తరలించారు.