ఆఫర్‌ పేరిట టోకరా..

ఆగని సైబర్‌  నేరాలు

జగదేవపూర్‌, న్యూస్‌టుడే: పోలీసులు ఎన్ని అవగాహన కార్యక్రమాలు నిర్వహిస్తున్నా.. ఎక్కడో చోట సైబర్‌ నేరాలు జరుగుతున్నాయి. ఆన్‌లైన్‌లో నేరగాళ్లు బురడీ కొట్టిస్తూనే ఉన్నారు. ఇదే తరహాలో జగదేవపూర్‌ మండలం తిమ్మాపూర్‌లో ఘటన చోటుచేసుకుంది. గత నెల 26న గ్రామానికి చెందిన చిప్ప నరేందర్‌ అనే యువకుడికి ఓ సైబర్‌ నేరగాడు ఫోన్‌ చేశాడు. ల్యాప్‌టాప్‌, చరవాణులు 50 శాతం తక్కువ ధరకే ఆఫర్‌లో అందిస్తామని వాటి ఫొటోలు పంపాడు. రూ.70 వేలు వెంటనే పంపించాలని సూచించాడు. నమ్మిన యువకుడు ఫోన్‌పే ద్వారా రూ.70 వేల పంపించాడు. తర్వాత రెండు రోజులకు అదే నెంబరుకు ఫోన్‌ చేయగా ఏమ్రాతం స్పందన లేదు. దీంతో మోసపోయానని గ్రహించి గత నెల 30న జాతీయ హెల్ప్‌లైన్‌ 1930కు ఫిర్యాదు చేశాడు. దీంతో బాధితుడికి చెందిన రూ.11,000 ఫ్రీజ్‌ అయినట్లు పోలీస్‌ కమిషనర్‌ శ్వేత తెలిపారు. సైబర్‌ నేరాల పట్ల అప్రమత్తంగా ఉండాలని.. 24 గంటలోపు సమాచారం ఇస్తే 99 శాతం మేర సొమ్ము రికవరీ చేయడానికి అవకాశాలు ఉంటాయన్నారు.