ఐక్యంగా వెళ్దాం.. జెండా ఎగరేద్దాం

సంఘీభావం తెలుపుతున్న జగదీశ్వరి, నాయకులు
గుమ్మలక్ష్మీపురం, న్యూస్‌టుడే: కురుపాం నియోజకవర్గంలో పసుపు జెండా ఎగురవేసి చంద్రబాబుకు బహుమతిగా ఇస్తామని తెదేపా నాయకులు నినదించారు. కూటమి అభ్యర్థిని జగదీశ్వరి ఆధ్వర్యంలో మంగళవారం గుమ్మలక్ష్మీపురం నుంచి ఎల్విన్‌పేట వరకు భారీ ప్రచార ర్యాలీ నిర్వహించారు. ఇంటింటికీ వెళ్లి సూపర్‌- 6 పథకాల గురించి వివరించారు. జగదీశ్వరి మాట్లాడుతూ.. గడిచిన ఐదేళ్ల పాలనలో ఎమ్మెల్యే పుష్పశ్రీవాణి గిరిజనుల కోసం ఎలాంటి అభివృద్ధి చేయకుండా, ప్రజాధనం దోచుకున్నారని ఆరోపించారు. రోడ్లు, తాగు, సాగునీటి వనరులను పట్టించుకోలేదన్నారు. ఆదివాసీ బిడ్డగా తనను ఆశీర్వదిస్తే మన్యంలో అభివృద్ధి చేసి చూపిస్తానన్నారు. రాష్ట్ర కార్యదర్శి వీరేశ్‌చంద్రదేవ్‌ మాట్లాడుతూ.. వైకాపా అబద్ధపు హామీలతో ప్రజలు మోసపోవద్దని సూచించారు. గిరిజనులంతా ఏకమై గిరిజన మహిళను గెలిపించి చట్టసభల్లో అడుగు పెట్టించాలన్నారు. ఈ కార్యక్రమంలో నాయకులు దత్తి లక్ష్మణరావు, మల్లేశ్వరరావు, సుదర్శనరావు, రామకృష్ణ, రంజిత్‌కుమార్‌, కృష్ణబాబు, పద్మావతి, భూషణరావు, కళావతి, తమ్మయ్య, రమణమూర్తి, దివాకర్‌, భారతమ్మ తదితరులు పాల్గొన్నారు.