అక్రమ తవ్వకాలపై రూ.95 లక్షల అపరాధ రుసుం

భోగాపురం వద్ద సర్పంచితో మాట్లాడుతున్న ఏడీ సుబ్బారాయుడు

రోలుగుంట, న్యూస్‌టుడే: జిల్లాలో నిబంధనలను అతిక్రమించిన వారి నుంచి రూ. 95 లక్షలు అపరాధ రుసుం వసూలు చేశామని గనుల శాఖ సహాయ సంచాలకులు సుబ్బారాయుడు వెల్లడించారు. ఇటీవల ఎం.కె.పట్నం శివారు ఛటర్జీపురం వద్ద అక్రమ గ్రావెల్‌ తవ్వకాలు, స్పందన కార్యక్రమంలో ఫిర్యాదులు అందాయి. ఆ క్వారీలను పరిశీలించడానికి ఆయన మంగళవారం రోలుగుంట వచ్చారు. అనంతరం విలేకరులతో మాట్లాడారు. ఛటర్జీపురం వద్ద గ్రావెల్‌ తవ్వకాలు చేపట్టిన వారికి నోటీసులిస్తామన్నారు. కంచుగుమ్మల శివారు భోగాపురం వద్ద రహదారి అధ్వానంగా తయారైందని, దీనికి తాత్కాలిక పరిష్కారం చూపాలని కంచుగుమ్మల సర్పంచి బండారు శ్రీనివాసరావు, మాజీసర్పంచి రాజేశ్వరి తదితరులు కోరారు. పరిశీలించి చర్యలు తీసుకుంటామని ఏడీ హామీ ఇచ్చారు.