నీటిశుద్ధి కేంద్రాల్లో ‘విజిలెన్స్‌’ తనిఖీలు

పీఎంపాలెం ప్లాంట్‌లో పరిశీలిస్తున్న విజిలెన్స్‌ అధికారిణి స్వరూపారాణి

ఎం.వి.పి.కాలనీ, న్యూస్‌టుడే : నగర పరిధిలోని నీటిశుద్ధి కేంద్రాల (ఆర్వోప్లాంట్ల) నిర్వహణపై ఫిర్యాదులు వచ్చిన నేపథ్యంలో శుక్రవారం విజిలెన్స్‌ ప్రాంతీయ అధికారి జి. స్వరూపారాణి, ఆహార భద్రత విభాగానికి చెందిన అధికారులతో కలసి డాబాగార్డెన్స్‌, పి.ఎం.పాలెం, రుషికొండ తదితర ప్రాంతాల్లోని ఆరు కేంద్రాల్లో తనిఖీలు చేశారు. ఆయా కేంద్రాల్లో నీటిని శుద్ధి చేస్తున్న విధానంపై ఆరా తీశారు. వీటిలో కొన్ని ప్లాంట్లు ఎలాంటి అనుమతులు లేకుండా నిర్వహిస్తున్నట్లు గుర్తించారు. పలు కేంద్రాల నుంచి ఆహారభద్రత అధికారులు 16 లీటర్ల నీటి నమూనాలను సేకరించారు. రికార్డులు నిర్వహించకపోవడం, అనుమతులు తీసుకోకపోవడం, ట్యాంకులను సరిగా శుభ్రం చేయకపోవడంపై నివేదిక రూపొందించనున్నారు.