అప్పన్న సన్నిధిలో... 22న పంచాంగ శ్రవణం

సింహాచలం, న్యూస్‌టుడే:  చైత్ర శుద్ధ పాఢ్యమిని పురస్కరించుకుని  శ్రీవరాహలక్ష్మీ నృసింహ స్వామివారి దేవాలయంలో ఈ నెల 22న శ్రీశోభకృత్‌ నామ సంవత్సర ఉగాది వేడుకలు ఘనంగా నిర్వహించనున్నట్లు దేవస్థానం ఈవో వి.త్రినాథరావు ఒక ప్రకటనలో తెలిపారు. ఆ రోజు సాయంత్రం పంచాంగ శ్రవణం సంప్రదాయబద్ధంగా జరుగుతుందన్నారు. అనంతరం స్వామివారి వార్షిక తిరు కల్యాణ మహోత్సవాలకు సంబంధించిన పందిరి రాట ఉడుపు ఉత్సవం జరుగుతుందని వివరించారు. ఉగాది ఉత్సవాలను పురస్కరించుకుని పండిత సత్కారం, దాతలకు విశిష్ట సేవా పురస్కారాలు ప్రదానం చేస్తామన్నారు. సాయంత్రం 4 గంటలకు సూర్యకిరణాలు స్వామివారి సన్నిధిని చేరుతాయని తెలిపారు. ఉత్సవాల అనంతరం స్వామి, అమ్మవార్ల గ్రామ తిరువీధి వైభవోపేతంగా జరుగుతుందని తెలియజేశారు.