‘అదానీ గంగవరం’ పోర్టు వద్ద ఉద్రిక్తత

వేతనాలు పెంచాలని కార్మికుల ఆందోళన
డీజిల్‌ పోసుకుని ఓ వ్యక్తి ఆత్మహత్యాయత్నం

నిరసన తెలుపుతున్న గంగవరం పోర్టు కార్మికులు

గాజువాక, న్యూస్‌టుడే : వేతనాలు పెంచాలని డిమాండ్‌ చేస్తూ ‘అదానీ గంగవరం’ పోర్టు కార్మికులు శుక్రవారం ఆందోళనకు దిగారు. వివిధ విభాగాల కార్మికులు గేటు లోపల బైఠాయించి నినాదాలు చేశారు. శ్రమకు తగిన వేతనాలు చెల్లించాలని, ఉద్యోగ భద్రత కల్పించాలని, బోనస్‌ ఇవ్వాలని కోరారు. నిరసనకు హాజరైన కార్మికుడు పి.నూకరాజు తన వెంట తెచ్చుకున్న డీజిల్‌ను పోసుకుని ఆత్మహత్యకు ప్రయత్నించగా న్యూపోర్టు పోలీసులు, అధికారులు అడ్డుకున్నారు. వేతనాలు పెంచాలనే డిమాండ్‌పై గతంలో ప్రశ్నించిన కొందరు కార్మికులను విధుల నుంచి తొలగించిన యాజమాన్యం కక్షపూరితంగా వ్యవహరిస్తోందని ఆరోపించారు. ఇప్పటికైనా ప్రతి కార్మికుడికి రూ.36 వేల వేతనం చెల్లించాలని, లేకపోతే వీఆర్‌ ప్రకటించి ఒక్కో కార్మికుడికి రూ.50 లక్షల వరకు పరిహారం ఇవ్వాలని డిమాండ్‌ చేశారు. కార్మికులకు వివిధ పార్టీల నాయకులు మద్దతు ప్రకటించారు. ఈ సందర్భంగా విధుల నుంచి తొలగించిన కార్మికులను పనిలోకి తీసుకోవాలని, ఏటా 20 శాతం బోనస్‌ చెల్లించాలని, ప్రత్యేక మెడికల్‌ పాలసీ ప్రకటించాలని.. తదితర 11 డిమాండ్లను యాజమాన్యం ముందుంచారు.  పోర్టు యాజమాన్య ప్రతినిధులతో అఖిల పక్ష నాయకులు, పోర్టు కార్మిక సంఘాల నాయకులు చర్చలు కొనసాగించారు.