సమస్యలు వినిపించే అవకాశమేదీ!

ఐక్యత చాటుతున్న రైతు కార్యాచరణ సమితి ప్రతినిధులు

భీమవరం అర్బన్‌, న్యూస్‌టుడే: ప్రభుత్వం తరఫున అధికారులు నిర్వహించే జిల్లా స్థాయి సమావేశాల్లో రైతుల సమస్యలు వినిపించే అవకాశం కల్పించాలని ఏపీ రైతు కార్యాచరణ సమితి అధ్యక్షుడు కలిదిండి గోపాలకృష్ణంరాజు, ప్రధాన కార్యదర్శి పాతపాటి మురళీరామరాజు కోరారు. భీమవరంలో శుక్రవారం జరిగిన సమితి సమావేశంలో వారు మాట్లాడారు. ఉమ్మడి పశ్చిమగోదావరి జిల్లాలో సాగునీరు, వ్యవసాయ సలహా మండలి సమావేశాలు జరిగినప్పుడు తమకు ఆహ్వానం ఉండేదన్నారు. నూతన జిల్లా ఏర్పడ్డాక అలాంటి అవకాశం ఇవ్వలేదన్నారు. ఈ అంశాన్ని కలెక్టర్‌ దృష్టికి తీసుకెళ్తామన్నారు. రాజకీయ నేపథ్యం ఉన్నవారు అధికారిక సమావేశాల్లో రైతుల సమస్యలు ప్రస్తావించే అవకాశం ఉండదన్నారు. సమావేశంలో సంఘ నాయకులు తమ్మినీడి నాగేశ్వరరావు, గంటా సుందరకుమార్‌, సీతారామరాజు, నల్లం నాగేశ్వరరావు, వడ్డి సుబ్బారావు తదితరులు పాల్గొన్నారు.