ఆరోగ్య కేంద్రాలకు.. విద్యుత్తు కోత!

భారీగా పేరుకుపోయిన బకాయిలు

ఫ్యూజు పీకేసిన విద్యుత్తు సంస్థ సిబ్బంది

పెనుగొండ గ్రామీణ, న్యూస్‌టుడే: పేదలకు సత్వర వైద్య సేవలు అందించడానికి ఏర్పాటు చేసిన ఆరోగ్య కేంద్రాలకు విద్యుత్తు సరఫరా ఆగిపోయింది. రూ.లక్షల్లో విద్యుత్తు బిల్లుల బకాయిలు పేరుకుపోవడంతో మూడు నెలల కిందటే విద్యుత్తు సంస్థ అధికారులు ఫ్యూజ్‌లు పీకేశారు. ఆనాటి నుంచి ఆరోగ్య కేంద్రాల్లో పని చేసే ఉద్యోగులు ఏదోలా కాలం నెట్టుకొస్తున్నారు. పెనుగొండ మండలంలోని దొంగరావిపాలెం ఆరోగ్య ఉప కేంద్రానికి రూ.లక్షకు పైగా బిల్లు వచ్చింది. ములపర్రు రూ.49 వేలు, నడిపూడి రూ.23 వేలు, దేవ రూ.21 వేలు, ఇలపర్రు రూ.25 వేలు వరకు వచ్చాయి. ఇలా ప్రతి కేంద్రంలో అధిక బిల్లులు రావడంతో విద్యుత్తు సంస్థ అధికారులు సరఫరా నిలిపివేశారు. ప్రస్తుతం ఎండలు మండుతుండటంతో కేంద్రంలో ఉన్న వైద్య సిబ్బందికి ఉక్కబోత తప్పటం లేదు. ఈ పరిస్థితిపై సిద్ధాంతం పీహెచ్‌సీ వైద్యాధికారిణి సుప్రియను ‘న్యూస్‌టుడే’ సంప్రదించగా గతంలో ఆరోగ్య కేంద్రాలకు ప్రత్యేక బడ్జెట్‌ వచ్చేదన్నారు. ప్రస్తుతం రాక బిల్లులు ఆగిపోయాయని, విద్యుత్తు సరఫరా నిలిపివేయడంపై ఉన్నతాధికారులకు నివేదించామని తెలిపారు.