నెలాఖరు వరకే సాగునీటి సరఫరా

ఉండి ప్రధాన పంటకాలువ

ఉండి, న్యూస్‌టుడే: పంట కాలువలకు నీటి సరఫరా ఈ నెల 30వ తేదీతో నిలిపివేసేందుకు అధికారులు సమాయత్తమవుతున్నారు. గోదావరిలో నీటి లభ్యత తక్కువగా ఉండటంతో ఫిబ్రవరి 5 నుంచి ఏప్రిల్‌ 9వ తేదీ వరకు వారబందీ (వంతుల వారీ విధానం)లో సాగునీటి విడుదలకు కార్యాచరణ రూపొందించారు. రబీ సాగు ఆలస్యంగా ప్రారంభం కావడం..ఈ గడువులోపు కాలువల శివారు, మెరక భూముల్లో పంట గట్టెక్కే పరిస్థితి లేకపోవడంతో నెలాఖరు వరకూ నీరివ్వాలని రైతులు అధికారులకు విన్నవించారు. ఈ క్రమంలో సరఫరా  కొనసాగించి 3,200 నుంచి 3,400 క్యూసెక్కుల మధ్య నీరందించారు. పది రోజుల నుంచి అన్ని ప్రాంతాల్లో వరికోతలు ప్రారంభం కావడంతో సాగు నీటి అవసరాలు తగ్గుతున్నాయని శివారు ప్రాంతాల రైతులు చెబుతున్నారు. పగటి ఉష్ణోగ్రతలు పెరుగుతున్న నేపథ్యంలో గ్రామాల్లో మంచినీటి చెరువులను యుద్ధప్రాతిపదికన నూరుశాతం నింపుకోవాలని అధికారులు ఆదేశిస్తున్నారు. డెల్టా పరిధిలో కాలువలకు బుధవారం 3,100 క్యూసెక్కుల నీరొదిలారు.