AndhraPradesh News: ఆయన బడికొచ్చి రెండేళ్లు.. 80 మంది విద్యార్థుల ఆవేదన

ఉపాధ్యాయుడి గైర్హాజరుతోచదువుకు దూరం

పాఠశాల వద్ద పిల్లలతో తల్లిదండ్రులు

ఒకట్రెండు రోజులు కాదు.. ఏకంగా రెండేళ్లగా ఆ పాఠశాలకు ఉపాధ్యాయుడు రావడం లేదు. ఉన్న ఒక్క గురువూ బడికి రాకపోవడంతో రెండేళ్లగా సుమారు 80 విద్యార్థులు చదువుకు దూరమయ్యారు. ఫలితంగా విద్యార్థుల భవిష్యత్తు అగమ్యగోచరంగా మారింది. గూడెంకొత్తవీధి మండలం మావోయిస్టు ప్రభావిత గాలికొండ పంచాయతీ బత్తునూరు గ్రామంలోని ప్రాథమిక పాఠశాలలో సుమారు 80 మంది విద్యార్థులున్నారు. ఇక్కడ పనిచేస్తున్న ఉపాధ్యాయుడు రెండేళ్లగా విధులకు హాజరుకావడం లేదు. 2020 మార్చిలో కరోనా లాక్‌డౌన్‌ నుంచి నేటి వరకూ ఆయన రావడంలేదు. తమది మారుమూల ప్రాంతం కావడంతో అధికారులెవ్వరూ పట్టించుకోవడం లేదని, దీంతో తమ పిల్లలు చదువులకు దూరమవుతున్నారని తల్లిదండ్రులు ఆవేదన వ్యక్తం చేస్తున్నారు. దీనిపై ఐటీడీఏ ప్రాజెక్టు అధికారికి ఫిర్యాదు చేస్తామని భాజపా మండల అధ్యక్షుడు చల్లంగి అచ్యుత్‌ తెలిపారు.

- సీలేరు, న్యూస్‌టుడే