చంద్రబాబు ఎదుట మహిళ కన్నీటిపర్యంతం

విజయనగరం అర్బన్‌, న్యూస్‌టుడే: విజయనగరం జిల్లా గజపతినగరం ఎమ్మెల్యే బొత్స అప్పలనర్సయ్య (వైకాపా) తమ కుటుంబాన్ని వేధిస్తున్నారని, భూములు లాక్కొనేందుకు యత్నిస్తున్నారని గజపతినగరం మండలం అంజీపురానికి చెందిన మేడిశెట్టి సుబ్బలక్ష్మి బొండాడ సభలో చంద్రబాబు ఎదుట కన్నీటిపర్యంతమయ్యారు. ‘గ్రామంలో మా వ్యవసాయ భూమిని లాక్కోవాలని ఎమ్మెల్యే అప్పలనర్సయ్య రెండేళ్లుగా ఇబ్బందులు పెడుతున్నారు. ఇటీవల రికార్డుల్లో పేర్లు సైతం మార్చేశారు. దీని వెనుక ఓ విశ్రాంత జేఈ, కొందరు వైకాపా నాయకులు ఉన్నారు. ఎవరినడిగినా ఎమ్మెల్యే పేరే చెబుతున్నారు. భూమి రికార్డులన్నీ మా దగ్గర ఉన్నాయి. రెండు రోజుల క్రితమే మా భూమిని దున్నేసి, స్తంభాలు పాతేశారు. దీంతో మనోవేదనకు గురై నా భర్త మంచానపడ్డారు. ఆసుపత్రిలో ఉండి సోమవారమే ఇంటికి వచ్చారు. నన్ను, నా భర్తను కాపాడండి. మాకు న్యాయం జరిగేలా చూడండి’ అని విలపించారు. ‘మీ కుటుంబాన్ని ఇబ్బంది పెడుతున్న వారిని జైల్లో వేయిస్తా. అధికారంలోకి రాగానే భూమిని అప్పగించి, మీ భర్తను కాపాడతాం. అధికారంలోకి రాగానే భూ సమస్యలన్నీ పరిష్కరిస్తాం’ అని చంద్రబాబు భరోసా ఇచ్చారు.