సీఈఓకు ఎన్డీయే నేతల వినతి

ఈనాడు డిజిటల్‌, అమరావతి: వృద్ధులు, దివ్యాంగులు, వితంతువులు, ఒంటరి మహిళలు తదితరులకు మే ఒకటో తేదీ నుంచి ఇళ్ల వద్దే పింఛన్లు అందజేసేలా చర్యలు తీసుకోవాలని రాష్ట్ర ప్రధాన ఎన్నికల అధికారి (సీఈఓ) ముకేశ్‌కుమార్‌ మీనాను ఎన్డీయే నేతలు కోరారు. సచివాలయాల వద్ద పింఛన్లు తీసుకోవాలనే నిబంధన వల్ల ఏప్రిల్‌ నెలలో 31 మంది వృద్ధులు మరణించారని గుర్తుచేశారు. మే నెలలో ఇలాంటి ఇబ్బందులు తలెత్తకుండా చూడాలని తెదేపా పొలిట్‌బ్యూరో సభ్యుడు వర్ల రామయ్య, పార్టీ నేతలు మన్నవ సుబ్బారావు, మర్రెడ్డి శ్రీనివాసరెడ్డి, భాజపా నేత ఆర్డీ విల్సన్‌, జనసేన నేత శివశంకర్‌లు మంగళవారం సీఈఓ దృష్టికి తీసుకెళ్లారు. అనంతరం వర్ల రామయ్య విలేకరులతో మాట్లాడారు. ‘వైకాపాకు చెందిన రామాల మన్విత్‌ కృష్ణారెడ్డి తెదేపా లోగో, చంద్రబాబు ఫొటో పెట్టుకొని.. తెదేపాకు వ్యతిరేకంగా ప్రచారం చేస్తున్నారు. ఎస్సీ, ఎస్టీ, మైనారిటీల్లో విద్వేషం రెచ్చగొట్టేలా మాట్లాడుతున్నారు. గతంలో ఆయనపై సీఐడీకి ఫిర్యాదు చేసినా ఎలాంటి చర్యలు తీసుకోలేదు’ అని తెలిపారు.