తీవ్రంగా ఖండించిన తెదేపా ఎన్నారై విభాగం

ఈనాడు డిజిటల్‌, అమరావతి: సీఎంఆర్‌ఎఫ్‌(ముఖ్యమంత్రి సహాయనిధి) ద్వారా వైకాపా ప్రభుత్వం చేసిన సాయం కంటే ఎన్నారైలుగా తాము అయిదు రెట్లు ఎక్కువ చేశామని తెదేపా ఎన్నారై నేతలు తెలిపారు. దేశ ప్రగతికి తమవంతు కృషి చేస్తున్న ఎన్నారైల ఆత్మగౌరవాన్ని దెబ్బతీసేలా సాక్షి పత్రిక సహా.. సామాజిక మాధ్యమాల్లో వైకాపా నాయకులు దుష్ప్రచారం చేయడం దారుణమని వాపోయారు. ‘గుంటనక్కాల్లా గ్రామాల్లోకి వచ్చారు’ అంటూ సాక్షి పత్రికలో ప్రచురించిన కథనాన్ని వారు తీవ్రంగా ఖండించారు. అధికార పార్టీ నాయకుల దిగజారుడుతనానికి ఈ రాతలు నిదర్శనమని ఆగ్రహం వ్యక్తం చేశారు. మంగళగిరిలోని తెదేపా కేంద్ర కార్యాలయంలో ఎన్నారై తెదేపా నేతలు సాయి, సతీష్‌, నాగమల్లేశ్వరరావు తదితరులు మీడియాతో మాట్లాడారు. ‘అబద్ధం ప్లస్‌ బుదర ఇక్వెల్‌ టు వైకాపా. కొవిడ్‌ సహా అనేక విపత్తుల్లో ఎన్నారైలుగా మా వంతు సేవ చేశాం. ఆస్ట్రేలియా, యూరప్‌ సహా వివిధ దేశాల్లో తెలుగువారికి ఏ కష్టమొచ్చినా అండగా నిలిచాం. రాష్ట్రంలో కూటమి అధికారంలోకి వచ్చాక అనేక దేశాల నుంచి ఏపీకి పెట్టుబడులు తీసుకురావడానికి కృషి చేస్తాం. మాపై అనుచిత వ్యాఖ్యలు చేస్తున్న వైకాపా నాయకులు వెంటనే క్షమాపణలు చెప్పాలి’ అని సాయి డిమాండ్‌ చేశారు. ఎన్నారైలపై అనుచిత వ్యాఖ్యల్ని పార్టీల కతీతంగా అందరూ ఖండించాలని సతీష్‌ కోరారు.