విశాఖపట్నం: అనకాపల్లి లోక్‌సభ ఎంపీ అభ్యర్థి సీఎం రమేశ్‌పై దాడిని మాజీ మంత్రి గంటా శ్రీనివాసరావు ఖండించారు. డిప్యూటీ సీఎం బూడి ముత్యాలనాయుడి తీరు దొంగే.. దొంగ.. దొంగ అని అరిచినట్లు ఉందని వ్యాఖ్యానించారు. ఓటమి భయంతోనే ముత్యాలనాయుడు, ఆయన అనుచరులు ప్రత్యర్థులపై దాడులకు దిగుతున్నారని విమర్శించారు. ఎంవీపీ కాలనీలోని తన నివాసంలో గంటా శ్రీనివాసరావు మీడియాతో మాట్లాడారు.

ఈ సంస్కృతి ఉత్తరాంధ్రలో ఎప్పుడూ లేదని, సీఎం జగన్‌ ఫ్రస్టేషన్‌కు ఇది ఒక ఉదాహరణగా చెప్పొచ్చని అన్నారు. ఇలాంటి ఘటనలు పునరావృతం కాకుండా ఎన్నికల సంఘం చర్యలు తీసుకోవాలని గంటా కోరారు. కూటమి ఉమ్మడి మ్యానిఫెస్టోకు ప్రజల్లో విశేష ఆదరణ లభిస్తోందని, భారీ మెజార్టీతో కూటమి ప్రభుత్వం ఏర్పాటు కావడం ఖాయమన్నారు. జూన్ 9న ముఖ్యమంత్రిగా చంద్రబాబు ప్రమాణం చేయడం తథ్యమన్నారు. ఉత్తరాంధ్రలోని 34 స్థానాలకు గానూ కూటమి కనీసం 30 సీట్లు సాధిస్తుందని ధీమా వ్యక్తం చేశారు.