32మంది మరణాలకు జగనే కారణం: లోకేశ్‌

ఈనాడు, అమరావతి: ఒకటో తారీఖున పింఛను ఇవ్వాల్సి వస్తుందని తెలిసినా..  సరిపడా నిధులివ్వకుండా వృద్ధుల్ని సచివాలయాల దగ్గర బారులు తీరేలా చేసింది సీఎం జగనేనని తెదేపా ప్రధాన కార్యదర్శి లోకేశ్‌ ధ్వజమెత్తారు. ‘ప్రతి గడపకు వెళ్లి పింఛను ఇవ్వాల్సిన బాధ్యత ప్రభుత్వంపై ఉంది. అవసరమైతే అధికారులందరినీ పంపిణీకి పంపమని ఎన్నికల సంఘాన్ని కోరాం’ అని వివరించారు. కృష్ణాయపాలెంలో శుక్రవారం ఎన్నికల ప్రచారంలో లోకేశ్‌ మాట్లాడుతూ.. ‘పింఛన్లకు పూర్తిస్థాయిలో నిధులివ్వకుండా.. ఒక్కో సచివాలయానికి 9నుంచి 10శాతమే మాత్రమే అందజేశారు. ఇది తెలియక వృద్ధులంతా పింఛన్ల కోసం బారులు తీరారు. రాష్ట్రవ్యాప్తంగా 32మంది చనిపోయారు’ అని ప్రభుత్వంపై మండిపడ్డారు. ‘ఆ అవ్వతాతల మరణాలను తనకు అనుకూలంగా మార్చుకొని ఎన్నికల్లో లబ్ధి పొందడానికి జగన్‌ శవరాజకీయం చేస్తున్నారు. పింఛను రూ.4వేలు చేసే బాధ్యతను ఏర్పడబోయే కూటమి ప్రభుత్వం తీసుకుంటుందని.. వాలంటీరు వ్యవస్థను కొనసాగిస్తాం’ అని లోకేశ్‌ హామీ ఇచ్చారు.