పట్టించుకోని పోలీసులు
ఆగ్రహం వ్యక్తం చేసిన పీసీసీ అధ్యక్షురాలు

దెందులూరు, ఏలూరు టూటౌన్‌, న్యూస్‌టుడే: పోలీసుల నిర్లక్ష్య వైఖరి కారణంగా పీసీసీ అధ్యక్షురాలు వైఎస్‌ షర్మిల అరగంట సేపు ట్రాఫిక్‌లో చిక్కుకుపోయారు. ప్రభుత్వంపైనా, పోలీసుల తీరుపైనా ఆమె తీవ్ర ఆగ్రహం వ్యక్తం చేశారు. ఏలూరు జిల్లా దెందులూరు మండలం గోపన్నపాలెంలో శుక్రవారం రాత్రి రోడ్‌షో ముగించుకున్న అనంతరం షర్మిల తన వాహనంలో బయలుదేరగా ట్రాఫిక్‌లో చిక్కుకుపోయారు. రోడ్‌షోకు ముందు హడావిడి చేసిన పోలీసులు కార్యక్రమం ముగిశాక కనిపించకుండా పోయారు. జంగారెడ్డిగూడెం వైపు నుంచి ఏలూరు, ఏలూరు నుంచి గోపన్నపాలెం వైపు వచ్చే వాహనాలు ఎదురెదురుగా నిలిచి పోయాయి. మధ్యలో షర్మిల ప్రయాణిస్తున్న వాహనం చిక్కుకుపోయింది. వాహనంలో నుంచి ఆమె మైక్‌లో మాట్లాడారు. ‘పోలీసులు ఏమయ్యారు. ట్రాఫిక్‌ను ఎందుకు కట్టడి చేయలేక పోతున్నారు. అనుమతి తీసుకునే కదా రోడ్‌షో పెట్టాను’ అంటూ ఆవేదన చెందారు. ఈ విషయాన్ని తెలియజేసేందుకు ఎస్పీకి, ఎన్నికల అధికారులకు షర్మిల ఫోన్‌ చేయగా.. ఎవరూ స్పందించలేదు. చివరకు కలెక్టర్‌కు ఫోన్‌ చేయడంతో ఆయన మాట్లాడారు. ఆయన ఆదేశాల మేరకు పోలీసులు చేరుకుని వాహనాల రాకపోకలను క్రమబద్ధీకరించారు. అరగంట తర్వాత ఆమె వాహనం బయలుదేరింది.