పెనుకొండ పట్టణం, న్యూస్‌టుడే: ఓటర్లను ప్రలోభాలకు గురిచేసేందుకు అధికార పార్టీ అనేక అడ్డదారులు తొక్కుతోంది. ఇందులో భాగంగా తాయిలాలను అందించేందుకు శ్రీసత్యసాయి జిల్లా పెనుకొండ వైకాపా ఎమ్మెల్యే అభ్యర్థి కేవీఉష, ఆమె భర్త శ్రీచరణ్‌రెడ్డి, సీఎం జగన్‌ చిత్రాలతోపాటు.. ఆ పార్టీ గుర్తు ఉన్న కూపన్లు, వాటి పక్కనే ఓటరు వివరాలను ముద్రించి ఓటర్లకు అందజేస్తున్నారు. ఈ కూపన్‌ పొందిన ఓటర్లు.. వాటిని తిరిగి వెనక్కి ఇస్తే రూ.3వేల నగదు ఇస్తామని చెప్పినట్లు సమాచారం. అధికార పార్టీ ఇలా బహిరంగంగా ప్రలోభాలకు తెరలేపినా.. అధికారులు చర్యలు చేపట్టడం లేదన్న విమర్శలు వినిపిస్తున్నాయి.