ఈనాడు డిజిటల్‌, అమరావతి: తెదేపా, జనసేన, భాజపా కూటమికి మద్దతుగా విశ్వహిందీ పరిషత్తు జాతీయ అధ్యక్షుడు ఆచార్య యార్లగడ్డ లక్ష్మీ ప్రసాద్‌ ప్రచారం చేయనున్నారు. హిందీతో పాటు భారతీయ భాషల అభివృద్ధికి అండగా నిలుస్తానన్న ప్రధాని మోదీ భరోసా నేపథ్యంలో.. ఎన్డీయే కూటమికి విశ్వహిందీ పరిషత్తు సంపూర్ణ సహకారం అందిస్తుందని యార్లగడ్డ ప్రకటించారు. ఈ మేరకు సంస్థ జాతీయ కార్యవర్గం తీర్మానించి యార్లగడ్డను ఏపీలోని కూటమి అభ్యర్థుల తరఫున ప్రచారం చేయమని ఆదేశించింది. గురువారం విజయవాడ పశ్చిమ, కైకలూరు, ఉండి శాసనసభతో పాటు రాజమండ్రి లోక్‌సభ నియోజకవర్గ పరిధిలో ప్రచారం నిర్వహించనున్నారు. శుక్రవారం అనకాపల్లిలో ఓ ప్రచార కార్యక్రమానికి హాజరుకానున్నారు. అనంతరం ధర్మవరం, రాజంపేట నియోజకవర్గాల్లో పర్యటిస్తారు.