ఆదర్శ మహిళా మండలి అధ్యక్షురాలు కోవూరు శ్రీలక్ష్మి

గుంటూరు నగరం, న్యూస్‌టుడే: వైకాపా నాయకుల దౌర్జన్యాలకు గురైన బాధితులందరికీ న్యాయం చేయాలని ఆదర్శ మహిళా మండలి అధ్యక్షురాలు కోవూరు శ్రీలక్ష్మి డిమాండ్‌ చేశారు. వైకాపా పాలనలో జరిగిన అక్రమాలకు నిరసనగా గుంటూరు స్వర్ణభారతినగర్‌లోని తన నివాసంలో శ్రీలక్ష్మి శనివారం నిరవధిక నిరాహార దీక్ష చేపట్టారు. ఈసందర్భంగా ఆమె మాట్లాడుతూ.. వైకాపా కార్యకర్తల అరాచకాలతో ఎంతో మందికి అన్యాయం జరిగిందన్నారు. పేదల ఇళ్ల స్థలాలకు నకిలీ పత్రాలు సృష్టించి దౌర్జన్యంగా ఆక్రమించి విక్రయించుకున్నారన్నారు. వైకాపా పాలనలో స్వర్ణభారతి నగర్‌, కృష్ణ తులసినగర్‌ తదితర ప్రాంతాల్లో జరుగుతున్న అరాచకాలపై దిల్లీలో ఫిర్యాదు చేశామన్నారు. అధికారుల సంతకాలు ఫోర్జరీ చేసి, ప్రభుత్వ కార్యాలయాల్లో రికార్డులు తారుమారు చేశారన్నారు. వైకాపా నాయకులు యువతను గంజాయికి బానిసలుగా మార్చి వారితో అమాయకులపై దాడులు చేయిస్తున్నారన్నారు. బాధితులకు న్యాయం జరిగేవరకు దీక్ష కొనసాగిస్తానని చెప్పారు. న్యాయవాది శైలజ, ఉమ, శ్రీలత, మాధవి తదితరులు దీక్షా శిబిరాన్ని సందర్శించి మద్దతు తెలిపారు.