భాజపా నేత లంకా దినకర్‌ ఎద్దేవా

ఈనాడు డిజిటల్‌, అమరావతి: ల్యాండ్‌ టైటిలింగ్‌ యాక్ట్‌ ద్వారా రైతుల భూమి పాస్‌బుక్‌లు, హద్దురాళ్లపై ఫొటోలు వేసిన జగన్‌.. ఇక శ్మశానంలోని శిలాఫలకాలపైనా ఆయన బొమ్మ ముద్రించుకుటారేమోనని భాజపా రాష్ట్ర ముఖ్య అధికార ప్రతినిధి లంకా దినకర్‌ ఎద్దేవా చేశారు. ఈ యాక్ట్‌ను కేంద్రమే తీసుకువచ్చిందని వైకాపా అసత్య ప్రచారాలు చేస్తోందని మండిపడ్డారు. రెవెన్యూ చట్టాన్ని రాష్ట్రంలో కేంద్రమెలా అమలు చేస్తుందని ఓ ప్రకటనలో మంగళవారం ప్రశ్నించారు. ‘ప్రభుత్వ ఆస్తులను కాపాడటానికి కేంద్ర ప్రభుత్వం ప్రతిపాదనలు చేస్తే, జగన్‌ ప్రభుత్వం ప్రజల్ని భయభ్రాంతులకు గురి చేసేలా ఈ చట్టాన్ని రూపొందించింది. పులివెందులలో తన పొలం పాస్‌బుక్‌ పై జగన్‌ ఫొటో ఎందుకని వైకాపా నేత భాస్కర్‌రెడ్డి ప్రశ్నించినా సీఎం జగన్‌ భార్య భారతిరెడ్డి ఏం చెప్పలేకపోయారు’ అని పేర్కొన్నారు.