భాజపా నాయకురాలు ఖుష్బూ

కశింకోట, న్యూస్‌టుడే: ఒక్క అవకాశం అంటూ అధికారంలోకి వచ్చిన జగన్‌.. రాష్ట్రాన్ని నిలువునా ముంచేశారని భాజపా నాయకురాలు, జాతీయ మహిళా కమిషన్‌ సభ్యురాలు ఖుష్బూ అన్నారు. అనకాపల్లి జిల్లా కశింకోటలో మంగళవారం ఎన్డీఏ ఎంపీ అభ్యర్థి సీఎం రమేశ్‌కు మద్దతుగా ఆమె ప్రచారం నిర్వహించారు. రోడ్‌ షోలో పాల్గొని వైకాపా అరాచకాలను ఎండగట్టారు. అభివృద్ధిని కాంక్షించే సీఎం.రమేశ్‌, ఎమ్మెల్యే అభ్యర్థి కొణతాల రామకృష్ణలను గెలిపించాలని కోరారు. రమేశ్‌ గెలిస్తే కేంద్రంలో మంత్రి పదవి రావడం ఖాయమని పేర్కొన్నారు. కమలం, గ్లాసు గుర్తులను చూపిస్తూ ఓటు వేయాలని కోరారు. మాజీ ఎమ్మెల్సీ పీవీఎన్‌ మాధవ్‌, భాజపా జిల్లా అధ్యక్షుడు ద్వారపురెడ్డి పరమేశ్వరరావు తదితరులు పాల్గొన్నారు.