పాల్గొననున్న చంద్రబాబు, పవన్‌కల్యాణ్‌

ఈనాడు డిజిటల్‌, అమరావతి: రాష్ట్రంలో ప్రధాని మోదీ పర్యటన ఖరారైంది. ఈ నెల 6న రాజమహేంద్రవరం, అనకాపల్లి, 8న పీలేరు, విజయవాడలో నిర్వహించే బహిరంగ సభలు, రోడ్‌ షోల్లో మోదీ పాల్గొననున్నారు. ఈ మేరకు సంబంధిత వివరాలను విజయవాడలోని భాజపా కార్యాలయంలో ఆ పార్టీ ముఖ్య అధికార ప్రతినిధి లంకా దినకర్‌, తెదేపా ఎమ్మెల్సీ అశోక్‌బాబు, జనసేన అధికార ప్రతినిధి గౌతమ్‌ శుక్రవారం వెల్లడించారు. ఆయా సభలు, రోడ్‌ షోలకు తెదేపా, జనసేన అధినేతలు చంద్రబాబు, పవన్‌కల్యాణ్‌ కూడా హాజరుకానున్నట్లు తెలిపారు.

• మే 6 సోమవారం మధ్యాహ్నం 3.30 గంటలకు రాజమహేంద్రవరం లోక్‌సభ నియోజకవర్గం పరిధిలోని వేమగిరిలో ఏర్పాటు చేసిన బహిరంగ సభలో ప్రసంగిస్తారు. సాయంత్రం 5.55 గంటలకు అనకాపల్లి సభలో పాల్గొంటారు.
•  మే 8 బుధవారం మధ్యాహ్నం 3 గంటలకు అన్నమయ్య జిల్లా పీలేరు సభలో పాల్గొంటారు. అక్కడి నుంచి విజయవాడకు బయలుదేరుతారు. సాయంత్రం 5 గంటలకు విజయవాడలోని ఇందిరాగాంధీ మున్సిపల్‌ స్టేడియం నుంచి బెంజ్‌ సర్కిల్‌ వరకు సుమారు 2.5 కిలోమీటర్ల మేర రోడ్‌ షో నిర్వహిస్తారు.