కనకమేడల రవీంద్రకుమార్‌

ఈనాడు, దిల్లీ: రాష్ట్రంలోని బలహీనవర్గాలు, దళితులు, గిరిజనులు, ఎన్నారైల ఆస్తులను కబ్జా చేయడానికే సీఎం జగన్‌ ల్యాండ్‌ టైటిలింగ్‌ చట్టం తీసుకొచ్చారని తెదేపా మాజీ ఎంపీ కనకమేడల రవీంద్రకుమార్‌ ఆరోపించారు. శుక్రవారం ఆయన ఇక్కడ విలేకర్లతో మాట్లాడారు. ప్రజల ఆస్తులను కాజేయడానికే ఈ చట్టం తీసుకొచ్చి.. గెజిట్‌ నోటిఫికేషనూ విడుదల చేసిన వైకాపా ప్రభుత్వం ఇప్పుడు ప్రజల నుంచి వ్యతిరేకత రావడంతో అమలుపై రోజుకో అబద్ధం ఆడుతోందని విమర్శించారు. ప్రజల ఆస్తులను ఎవరి పేరున కావాలంటే వారి పేరున నమోదుచేయడానికి ఈ చట్టం టైటిల్‌ రిజిస్ట్రేషన్‌ ఆఫీసర్‌కు అవకాశం కల్పిస్తోందని పేర్కొన్నారు. వీరంతా ప్రభుత్వం నియమించిన అధికారులే కాబట్టి వైకాపా నాయకులు చెప్పినట్లు చేయడం ఖాయమని అభిప్రాయపడ్డారు. ప్రజలు ఈ కుట్రను గ్రహించి జగన్‌ ప్రభుత్వాన్ని సాగనంపాలని పిలుపునిచ్చారు. సీఎం జగన్‌ తన రాజకీయ స్వార్థం కోసం వృద్ధులకు ఇంటి దగ్గర పింఛన్లు ఇవ్వకుండా వారి మరణాలను కళ్లచూస్తున్నారని ధ్వజమెత్తారు.