అడ్డుకున్న జన సైనికులు, ఆర్వోకు ఫిర్యాదు

విజయవాడ (సూర్యారావుపేట), న్యూస్‌టుడే : ప్రజాకర్షణ తగ్గిపోయి ఓటమి భయం పట్టుకున్న వైకాపా.. ఎన్డీయే కూటమిని ఓడించేందుకు తాజాగా సరికొత్త కుట్రకు తెర తీసింది. జనసేన, తెదేపా, భాజపా పొత్తుల్లో భాగంగా విజయవాడ సెంట్రల్‌ నియోజకవర్గంలో తెలుగుదేశం అభ్యర్థి పోటీలో ఉండటంతో.. జనసేన గుర్తు ‘గాజు గ్లాసు’ను ఫ్రీ సింబల్‌ చేశారు. ఎన్నికల నిబంధనల ప్రకారం ఆంధ్ర రాష్ట్ర ప్రజా సమితి అభ్యర్థి గొల్లపల్లి ఫణిరాజ్‌కు ఆ గుర్తును కేటాయించారు. గాజు గ్లాసు గుర్తుతో ప్రచారం చేసుకోవాల్సిన ఫణిరాజ్‌.. ప్రచార వాహనాలపై జనసేన అధినేత పవన్‌ కల్యాణ్‌ చిత్రం కూడా ముద్రించి, ప్రచారం చేస్తుండడం వివాదాస్పదమైంది. దీన్ని గుర్తించిన పవన్‌ అభిమానులు, జన సైనికులు సదరు ప్రచార వాహనాలను అడ్డుకున్నారు. పవన్‌ కల్యాణ్‌ చిత్రాన్ని ప్రచార వాహనాలపై ఎందుకు ముద్రించారని ప్రశ్నించారు. సదరు అభ్యర్థి ఫణిరాజ్‌ సరైన సమాధానం చెప్పలేక ముఖం చాటేశారు. ఈ క్రమంలో మారుతీనగర్‌లో ఉద్రిక్త పరిస్థితి నెలకొంది. దీనిపై సెంట్రల్‌ నియోజకవర్గ జనసేన సమన్వయకర్త బొలిశెట్టి వంశీకృష్ణ, జన సైనికులు నియోజకవర్గ ఎన్నికల అధికారికి ఫిర్యాదు చేశారు. ఎన్డీయే కూటమి అభ్యర్థి మెజార్టీ తగ్గించేందుకే ఈ కుట్ర పన్నారని చెప్పారు. ఫణిరాజ్‌పై కేసు నమోదు చేయాలని కోరారు. అనంతరం విలేకర్లతో మాట్లాడుతూ.. వైకాపా ప్రోద్బలంతోనే తమ నాయకుడి ఫొటోలతో ప్రచారం చేస్తున్నారని ఆరోపించారు.