snowfall: హిమపాతంలో చిక్కుకున్న యాత్రికులు.. 400 మందిని రక్షించిన ఆర్మీ

గువాహటి: హిమపాతం (snowfall) లో చిక్కుకున్న దాదాపు 400 మంది యాత్రికులను భారత సైన్యం (Indian Army) కాపాడింది. వారికి అవసరమైన వసతి, వైద్యసేవలు అందించి, భోజనసౌకర్యాలు కల్పించినట్లు రక్షణశాఖ ప్రతినిధి లెఫ్టినెంట్‌ కల్నల్‌ మహేంద్ర రావత్‌ తెలిపారు. శనివారం సాయంత్రం దాదాపు 100 వాహనాల్లో 400 మంది ప్రయాణికులు సిక్కింలోని నాతులా, సొంగో సరస్సును సందర్శించి తిరిగి వస్తుండగా.. ఒక్కసారిగా హిమపాతం సంభవించింది. దీంతో పర్యాటకులందరూ మంచులో చిక్కుకుపోయినట్లు ఆర్మీ వెల్లడించింది. బాధితుల్లో 142 మంది మహిళలతోపాటు 50 మంది చిన్నారులు కూడా ఉన్నారు. సమాచారం అందుకున్న త్రిశక్తి దళానికి చెందిన సైనికులు స్థానిక పోలీసులతో కలిసి సంయుక్తంగా ‘ఆపరేషన్‌ హిమ్రహత్‌’ పేరుతో సహాయక చర్యలు చేపట్టారు. శనివారం రాత్రివరకు రెస్క్యూ ఆపరేషన్‌ జరిగినట్లు ఆర్మీ వెల్లడించింది. అనంతరం ఆదివారం ఉదయం రహదారిపై పేరుకుపోయిన మంచును ఆర్మీ జనరల్‌ రిజర్వ్‌ ఇంజినీరింగ్‌ ఫోర్స్‌ సాయంతో బుల్డోజర్లతో తొలగించారు. అనంతరం పర్యాటకులు గ్యాంగ్‌టక్‌కు పయనమైనట్లు లెఫ్టినెంట్‌ కల్నల్‌ రావత్‌ ఆదివారం మీడియాకు తెలిపారు.