Bilkis Bano: గోధ్రా సబ్‌ జైలులో లొంగిపోయిన బిల్కిస్‌ బానో కేసు దోషులు

దిల్లీ: సంచలనం సృష్టించిన బిల్కిస్‌ బానో (Bilkis Bano) కేసులో 11 మంది దోషులు ఆదివారం రాత్రి గుజరాత్‌లోని గోధ్రా సబ్‌జైలులో లొంగిపోయారు. తమకు కొన్ని బాధ్యతలున్నాయని, లొంగిపోయేందుకు మరింత సమయం ఇవ్వాలంటూ వారు ఇటీవల సుప్రీంకోర్టు (Supreme Court)ను ఆశ్రయించిన సంగతి తెలిసిందే. అయితే వారి పిటిషన్లను తోసిపుచ్చుతూ ఆదివారం నాటికి లొంగిపోవాలని అత్యున్నత న్యాయస్థానం వారికి డెడ్‌లైన్‌ విధించింది. దీంతో ఆదివారం రాత్రి 11 మంది దోషులు జైలు అధికారుల ఎదుట లొంగిపోయారు. 

2002లో గోధ్రా రైలు దహనకాండ అనంతరం గుజరాత్‌లో పెద్ద ఎత్తున చోటుచేసుకున్న మతపరమైన అల్లర్లలో బిల్కిస్‌ బానో కుటుంబానికి చెందిన ఏడుగురు సభ్యులు హత్యకు గురయ్యారు. 5 నెలల గర్భవతిగా ఉన్న బానోపై దుండగులు సామూహిక అత్యాచారానికి ఒడిగట్టారు. ఈ కేసులో 11 మంది నిందితులకు సీబీఐ ప్రత్యేక న్యాయస్థానం 2008లో యావజ్జీవ కారాగార శిక్ష విధించింది. 14 ఏళ్లుగా శిక్ష అనుభవిస్తున్న వారికి 2022లో గుజరాత్‌ ప్రభుత్వం రెమిషన్‌(శిక్ష తగ్గింపు) మంజూరు చేసింది. దీంతో 2022 ఆగస్టు 15న వారంతా జైలు నుంచి విడుదలయ్యారు. దీంతో గుజరాత్‌ ప్రభుత్వ నిర్ణయాన్ని సవాల్‌ చేస్తూ బానో సుప్రీం తలుపుతట్టారు. గుజరాత్‌ ప్రభుత్వం తీసుకున్న నిర్ణయాన్ని తప్పుపడుతూ.. వారి విడుదల చెల్లదని ఈ నెల 8న సుప్రీంకోర్టు కీలక తీర్పు వెలువరించింది. రెండు వారాల్లోగా జైలు అధికారుల వద్ద లొంగిపోవాలని ఆదేశించింది.