MK Stalin: చైనా జెండా వివాదం వేళ.. స్టాలిన్‌కు ‘మాండరిన్‌’లో బర్త్‌డే విషెస్‌

దిల్లీ: చైనా జెండా ప్రకటన వివాదం వేళ.. తమిళనాడు(Tamil Nadu) ముఖ్యమంత్రి ఎంకే స్టాలిన్‌(MK Stalin)ను ఉద్దేశించి భాజపా(BJP) వ్యంగ్యంగా పోస్టు పెట్టింది. ఆయనకు జన్మదిన శుభాకాంక్షలు చెప్పినట్టే చెప్పి, కౌంటర్ ఇచ్చింది. ఇంతకీ ఏం జరిగిందంటే..?

తమిళనాడులోని కులశేఖర పట్టణంలో నిర్మిస్తోన్న ఇస్రో లాంచ్‌ప్యాడ్‌ను ఉద్దేశించి డీఎంకే మంత్రి అనిత ఆర్‌ రాధాక్రిష్ణన్‌ ప్రకటన ఇచ్చారు. అందులో ప్రధాని మోదీ(Modi), స్టాలిన్‌(MK Stalin) ఫొటోలతో పాటు వెనకవైపున రాకెట్‌పై చైనా జెండా ఉండటం వివాదాస్పదమైంది. దీనిపై తీవ్ర విమర్శలు వ్యక్తమయ్యాయి. ఇది దేశ శాస్త్రవేత్తలు, రోదసీ రంగాన్ని అవమానించినట్లేనని మోదీ అన్నారు. ప్రజల సొమ్ముతో ప్రకటన ఇవ్వడం ద్వారా వారి పన్నులనూ దుర్వినియోగం చేశారని మండిపడ్డారు.

ఇదిలాఉంటే.. ఈరోజు స్టాలిన్‌ పుట్టినరోజు. భాజపా రాష్ట్ర విభాగం ఎక్స్‌(గతంలో ట్విటర్‌)లో ఆయనకు శుభాకాంక్షలు చెప్పింది. ఇది ఆయనకు ఇష్టమైన భాష అంటూ మాండరిన్‌లో విష్ చేసి, విమర్శించింది. మాండరిన్‌.. చైనా అధికారిక భాష.  అయితే తాను ఇచ్చిన ప్రకటనపై దుమారం రేగడంతో మంత్రి అనిత క్షమాపణలు చెప్పారు. ‘ప్రకటనలో పొరపాటు జరిగింది. దాని వెనక ఎలాంటి దురుద్దేశం లేదు. మా మనసుల్లో భారత్ పై ప్రేమ ఉంది’ అని వివరణ ఇచ్చారు.