Cabinet meet: కొత్త ప్రభుత్వంలో 100 రోజుల ప్రణాళిక సిద్ధం చేయండి.. మంత్రులకు మోదీ పిలుపు

దిల్లీ: కొత్త ప్రభుత్వం ఏర్పడిన తర్వాత.. తొలి 100 రోజులతో పాటు తదుపరి ఐదేళ్ల పాటు ప్రభుత్వం అనుసరించాల్సిన వ్యూహాలపై కార్యాచరణను రూపొందించాలని కేంద్ర మంత్రులకు ప్రధాని నరేంద్ర మోదీ (Narendra Modi) సూచించారు. ఇందుకోసం ఆయా మంత్రిత్వ శాఖలకు చెందిన సెక్రటరీలు, ఇతర ఉన్నతాధికారులతో సంప్రదింపులు జరపాలన్నారు. ఆదివారం ఉదయం ప్రధాని అధ్యక్షతన జరిగిన కేబినెట్‌ సమావేశంలో మంత్రులకు ఈ సూచనలు చేసినట్లు విశ్వసనీయ వర్గాలు వెల్లడించాయి. లోక్‌సభ ఎన్నికల (Lok Sabha Elections) షెడ్యూల్‌ ప్రకటించిన మరుసటి రోజే కేబినెట్‌ భేటీ కావడం గమనార్హం.

ఏడు దశల్లో లోక్‌సభ ఎన్నికల తేదీలను ప్రకటించే ప్రక్రియను కూడా కేబినెట్‌ ప్రారంభించింది. వీటికి సంబంధించి ఈసీ వెల్లడించిన షెడ్యూల్‌ను రాష్ట్రపతికి పంపించనుంది. ఏప్రిల్‌ 19 జరిగే 102 లోక్‌సభ స్థానాలకు గానూ మార్చి 20న తొలి నోటిఫికేషన్‌ జారీ కానుంది. ఆయా దశల ఎన్నికలకు ప్రత్యేకంగా నోటిఫికేషన్‌ విడుదల కానుంది.