Shashi Tharoor: శశిథరూర్‌కు ఫ్రాన్స్‌ అత్యున్నత పౌర పురస్కారం

దిల్లీ: కాంగ్రెస్‌ ఎంపీ శశిథరూర్‌కు (Shashi Tharoor) ఫ్రాన్స్‌ అత్యున్నత పౌరపురస్కారం ‘ చెవాలియర్‌ డె లా లీజియన్‌ డి హానర్’ వరించింది. దిల్లీలోని ఫ్రాన్స్‌ రాయబార కార్యాలయంలో మంగళవారం నిర్వహించిన కార్యక్రమంలో ఫ్రెంచ్‌ సెనేట్‌ అధ్యక్షుడు జెరార్డ్‌ లార్చర్‌ ఆయనకు పురస్కారాన్ని ప్రదానం చేశారు. ఆగస్టు 2022లో ఫ్రాన్స్‌ ప్రభుత్వం థరూర్‌కు ఈ అవార్డును ప్రకటించగా.. తాజాగా దానిని అందజేశారు. భారత్‌- ఫ్రాన్స్‌ మధ్య సంబంధాల బలోపేతం, అంతర్జాతీయ సహకారం, శాంతిస్థాపనకు థరూర్‌ చేసిన అవిశ్రాంత కృషికి గుర్తింపుగా ఈ పుస్కారాన్ని ప్రదానం చేసినట్లు ఫ్రాన్స్‌ రాయబార కార్యాలయం ప్రకటన విడుదల చేసింది. 

ఈ సందర్భంగా జెరార్డ్‌ లార్చర్‌ మాట్లాడుతూ.. దౌత్యవేత్తగా, రచయితగా, రాజకీయవేత్తగా శశిథరూర్‌ సేవలు చిరస్మరణీయమని కొనియాడారు. ఫ్రాన్స్‌కు ఆయన నిజమైన స్నేహితుడని, ఇరుదేశాల మధ్య సంబంధాలు బలోపేతం చేసేందుకు ఎంతో కృషి చేశారని అన్నారు. ఈ పురస్కారం ఆయనపై ఫ్రాన్స్‌కు ఉన్న స్నేహాన్ని, ప్రేమను సూచిస్తుందని, ప్రపంచ దేశాల అభివృద్ధిపట్ల ఆయన నిబద్ధతకు ఈ అవార్డు నిదర్శనమని అన్నారు. ఈ అవార్డు దక్కడం ఎంతో సంతోషంగా ఉందని, తన బాధ్యతను ఇది మరింత పెంచిందని శశిథరూర్‌ పేర్కొన్నారు. ‘‘ ఫ్రాన్స్‌ ప్రజల భాష, సంస్కృతి, సాహిత్యాలను మెచ్చుకునే వ్యక్తిగా, మీ దేశ అత్యున్నత పౌర పురస్కారం దక్కినందుకు ఎంతో గర్వపడుతున్నా’ అని వ్యాఖ్యానించారు.